Мана, 10.10.10 санаси ҳам ўз адоғига етди. Ким учун айрилиқ, ким учун ҳижрон, ким учун янги фарзанд, яна ким учун бахт сурури…Бир неча қизларнинг кўзёшларни оқизиб, Сардор Раҳимхон ҳам бахт тўйини ўтказди! Бир тўй бўлдики, шов-шуви бисёр! Сенсациялар эса ғиж-ғиж! Яхшиси, батафсил танишинг! Ахир, Раҳимхон бошқа ҳамкасблари каби тўйини СD дискларда сотувга чиқармоқчи эмас. (Ахир,бундай аҳмоқона ишни у ўзига эп кўрмайди! Шунинг учун ҳам яна бирра унга нисбатан респект!)
ТАНИҚЛИ МЕҲМОНЛАР РЎЙХАТИ:
Озодбек Назарбеков, Зулайҳо Бойхонова, Насиба Абдуллаева, Ғуломжон Ёқубов, Тоҳир Содиқов, Севара Назархон, Обид Асамов, Шукрулло Исроилов, Манзура, Райҳон, Шохруххон, Шохрух, Шаҳноз, Иззат Ибрагимов, Шаҳриёр, Паризода, Раъно Шодиева, Фаррух Сойипов, Адиз Ражабов, Жаҳонгир Позилжонов, Дилфуза Исмоилова, Улуғбек Раҳматуллаев, Алишер Узоқов…ва яна ўнлаб машҳур ва энди тетепоя қилиб чиқаётган хонандалар…
КИМДАН ЯХШИ БОШЛОВЧИ ЧИҚАДИ?
Тўйга иштирок этган санъаткор борки, уларнинг ҳар бирига бошловчилик қилиш "насиб этди”! Ҳеч бўлмаганда, навбатда турган ҳамкасбини саҳнада эълон қилди! Фаррух Сойиповнинг овози деярли эшитилмади ҳам. Яхшиям ёнида Зайнаббегимнинг шақилдоқ овози қулоқларни бузиб турди, бўламаса Сойипов саҳнага нега чиққанини ҳеч ким тушунмас эди! J
Алишер Узоқов ўз бошловчилик маҳоратини аъло даражада уддалади…
ФАКТЛАР:
1.Озодбекни бирон тўйда "тўйбоши” бўлганини кўрганмисиз ё эшитганмисиз?! Бу жуда уникал ҳол эди. Унинг зиммасида яна қанча жавобгарлик бор эди денг!? Меҳмонлар кўнглига қараш, саҳнадаги куйчилар рўйхатию сценарийдаги режалар амалга ошяпти ё йўқ, қўшиқ куйлаш, рақсга тушиш…Ҳаммасини ўз кўзи билан кўриб турганлар унга қойил қолишди! Айримлар ўз тўй ҳамшамларида миллиард тўлаб ҳам Озодбекни бундай хизматлар учун рози қила олмаслигини айтса, бошқа биров унинг шу қадар соддалиги ва муомала маданиятини тинмай мақтади.
2.Примадоннанинг қизи онаси ролида, Назарбеков Фаррух Зокиров ўрнида…Бу ҳақиқий сенсация! Бир пайтлар мегахитга айланган таронага яна янги умр бахш этилди! Хўш…Майли, буёғини вақт кўрсатади!
3.Шохруххон "Дажонам”ни куйлаши билан давра одамга тўлди. Куёв шарт ўрнидан турди-да, саҳна томон келиб, ўртоқлари билан роса рақсга тушди. Сардор ё тўйни шунчаки кузатиб туришдан чарчаган (ахир, унинг ўзи ҳамиша эл хизматида!) ё ҳақиқатан ҳам Шохнинг мухлиси!
4.Одамлар одам кўрмагандек, Жаҳонгир Позилжонов ва яна бир нечталарни қўл телефонига суратга олиш учун талашишди! Фақат Юлдуз Усмоновани соғинишганмикан деб ўйласак, кўпчилик шу сафда экан. Яна ким билади, дейсиз?
5.Кўп хонандаларга навбати етмади. Бир томондан навбати берилмагани ҳам жуда маъқул келди. Атиргул бўй тараётганида …. ҳидга на ҳожат?! Шунинг учун қуруқ шохга айланиб қолмасдан, гуллашни ҳам ўрганинг, азиз айрим хонандалар! Шунда навбатим қачон келаркин дея, столда овқатни паққос тушириб ўтирмасдан, ҳурматингиз билан ўз вақтида куйлайсиз! Яхшироқ ва ёқимлироқ ижод қилишни ўрганинг!
6.Сардор орзу умидли йигит! Тўйхонадаги декорацияни кўриб, кўзинг қувнайди. Энг қизиғи, ресторан залига кираверишдаги жонли ҳайкаллар. Бир фотосуратчи бир меҳмонга "ҳайкал билан суратга тушираман” деса, "энди шу қолувди” деб қўйди. Уларнинг жонли эканини билганида балки жон деб рози бўларди! Қизиқ, "Етти ҳайкал, бир кал” фильмидан андоза олинган ушбу ажойиб "декоратив топилма” хизмати учун ҳаммаёғини оққа бўяб олиб, қотиб турган (талаба ёки бошқа)ларга қанча ҳақ тўландийкин?! Ана энди бу аниқ "мода”га киради!
7.Келин ва куёвнинг ёнига яқинлашиб бўлмайди! "Охрана”ларни айтмайсизми?! Яқинлашганлари эса уларнинг ёнидан ҳеч кетмайди. Обид Асамовдан тортиб яна бир неча бошловчилар "махфий эълон”ни такрор-такрор айтишди: "Улар чиллалик!” Ҳеч ким бу чақириққа эътибор бермайди-я!?
8.Сардор Раҳимхон фотоаппарат ушлаб фотожамланма қилганидан хабарингиз бор. Бироқ, у тўйини оммавий тарзда, фотосуратлар билан ёритилишини таъқиқлади. Минг таассуфки, келин ва куёв тугул бутун тўй жараёнидан ҳеч бўлмаганда бир лавҳа олишга уринмаган қўл телефони қолмади! Кўрасиз, ҳали Сардорнинг ўзи буюртма берган фотоальбом тайёр бўлишга улгурмай, бутун республика тўйдан яхши хабарлар топишга улгуради! Бундай гўзал ва бахтли онлар барча юртдошларимизга насиб этсин!
9.Севимли актриса Раъно Ярашеванинг қизи, "Ниҳол-2010” совриндори Мадина Мумтознинг бу йилги таваллуд санаси ҳам шу машҳур санага 10.10.10га тўғри келиб қолганини қаранг! Устига-устак, севимли хонандасининг тўй кунига таклиф ҳам этилган! Мадина ўз туғилган кунини шу тўйда яқин инсонлари ва тўйдаги барча машҳур инсонлар қуршовида нишонлади! Ҳаётда ҳамма нарса бўлади.
10.Озодбек билан гаплашиб қолдик:
-Қани фотосуратчилар? Ёритмайсизларми?
-Йўқ. Сардор бу ишни хоҳламади.
-Нега энди? Хориж юлдузларини тинмай ёзгандан кўра, миллат қаҳрамонларига ҳам чуқур эътибор қаратиш керак! (пичинг билан)
-Яхшиси, сизнинг тўйингизни ёритамиз. Фотосуратчиларга рухсат берарсиз?!
-Жон деб рози бўлардим! Бироқ, бошқа уйланмайман-ку?! (кулади!)
