Ko‘rgazmadan lavhalar (Otabek Mirsoatov olgan surat)
O‘zbekiston Badiiy akademiyasi Markaziy ko‘rgazmalar zalida "Do‘ppi tikdim ipaklari tillodan…” respublika ko‘rik-tanlovi hamda "O‘zbekiston do‘ppilari” ko‘rgazma-savdosi boshlandi.
Respublika
Xotin-qizlar qo‘mitasi, Badiiy akademiya, Madaniyat va sport ishlari,
Oliy va o‘rta maxsus ta’lim vazirliklari, O‘rta maxsus, kasb-hunar
ta’limi markazi, Respublika Ma’naviyat targ‘ibot markazi, Kasaba
uyushmalari federatsiyasi kengashi, "O‘zbekteatr” ijodiy ishlab
chiqarish birlashmasi, Milliy teleradiokompaniya, Toshkent shahar
hokimligi hamkorligida tashkil etilgan ushbu tadbirda yurtimizning
barcha hududlariga xos bo‘lgan do‘ppi namunalari bilan tanishish mumkin.
Prezidentimiz
Islom Karimov rahnamoligida xalqimiz ma’naviyatini yanada yuksaltirish,
milliy an’ana va qadriyatlarimizni asrab-avaylash, ulardan yoshlarni
barkamol insonlar etib tarbiyalashda keng va samarali foydalanish
masalasi davlatimizning doimiy e’tiborida. Yurtimizda milliy
hunarmandchilik yanada ravnaq topmoqda, uning unutilgan usul va
maktablari tiklanmoqda, «ustoz-shogird» an’anasi davom ettirilmoqda.
"Barkamol avlod yili” Davlat dasturi doirasida tashkil etilgan "Do‘ppi tikdim ipaklari tillodan…” respublika ko‘rik-tanlovi hamda "O‘zbekiston do‘ppilari”
ko‘rgazma-savdosini o‘tkazishdan asosiy maqsad yoshlarda milliy an’ana
va qadriyatlarimizga hurmat va ehtirom tuyg‘ularini mustahkam qaror
toptirish, bebaho ma’naviy merosimizni keng targ‘ib va tashviq etishdan
iboratdir.
Mazkur tadbirlarning dastlabki bosqichlarida ta’lim
maskanlarining o‘quvchi va talaba qizlari, mahallalarda istiqomat
qilayotgan ayollar chevarlik, kashtachilik, do‘ppido‘zlik bo‘yicha o‘z
mahoratini namoyish etdi. Ayni paytda mohir hunarmandlar,
san’atshunoslar ishtirokida o‘tkazilgan davra suhbatlari, uchrashuvlar
yoshlarning milliy hunarmandchilikka oid bilimini kengaytirish imkonini
berdi. Ko‘rgazma-yarmarkada ijod namunalari eng sara deb topilgan
do‘ppido‘z xotin-qizlar o‘z mahsulotlari bilan ishtirok etmoqda.
Tadbirning
ochilishida O‘zbekiston Respublikasi Bosh vazirining o‘rinbosari,
Respublika xotin-qizlar qo‘mitasi raisi F.Akbarova ishtirok etdi.
man'ba: DxB-studio
