Tinib-tinchimagan Jahongir Poziljonov yana yangi film suratga olishga kirishdi. Ishchi nomi "Ali, Vali, G’ani” deya atalayotgan kartina yana o’sha komedik xislatlarga ega ekanligi bilan ajralib turadi. Bu gal ham rollarda siz Jahongir Poziljonov, Otabek Mirzaxolov va Javlon Shodmonovlarni ko’rishingiz mumkin bo’ladi. Qahramon qiz obraziga esa kim tanlanganini Jahongir hozircha aytmadi. Bu haqda sal keyinroq.

SЕRIALDAN KATTA KINOGA

Sherzod Davronovning "O’zbekiston” teleradiokanali tomonidan suratga olingan bir serialda ishtirok etgani unga kino olamining eshiklarini ochib yubordi, shekilli. Uni endi rostmona kinoga taklif qilishdi. Rejissyor Sanjar Shodiyev o’zi suratga olayotgan "Jigarbandim” filmiga bosh rollardan birini talqin etish uchun Sherzodni ham taklif etdi. Bu albatta, xonandani qiziqtirib qo’ydi, axir madaniyat institutini tamomlagan Davronov aktyorlikni ham anchadan buyon ko’ngliga tugib yurgandi-da. Film uchun saundtrekni ham Sherzod kuylaydigan bo’ldi. "Ota” deb nomlangan ushbu qo’shiqni siz premeradan oldin albatta, tinglaysiz.

YANGI YIL UCHUN MAXSUS FILM: "DAYDI”

"Lola” seriali orqali televizion seriallar va kino olamida o’z faoliyatini boshlagan "O’zbekiston” teleradiokanali jamoasi yana bir yangi serial ustida ish boshlashdi. "Daydi” deb nomlangan ushbu serial yangi yil arafasida tomoshabinlarga taqdim etiladi. Rollarni Otabek Mutalxo’jayev, Madina Mumtoz ijro etyapti. Garchi bu film kinoteatrlarda namoyish etilmasa-da, teletomoshabinlar uchun ajoyib sovg’a bo’lishi shubhasiz.