Kamina Botir Qodirov 1981 yil 6 mayda Andijon viloyatida tavallud
topganman. San'atkor oilasida ulg'aydim. Onam O'zbekistonda xizmat
ko'rsatgan artist Zulxumor Qodirovaning duolari sabab el mehrini
qozondim. Bolaligimda san'atkor emas, aksincha huquqshunos bo'lishni orzu
qilganman. Ammo taqdir ekan, voyaga yetgach san'at yo'lini tanladim. Aziz
Zaynobiddinov, Orolmirzo Safarov va Musaxon Nurmatovni ustozlarim
sifatida hurmat qilaman. Tor, gitara va boshqa zarbli asboblarni chala
olaman. Avvaliga gitara chalib, atrofdagilar nazariga tushganman. Ilk
qo'shig'im — "Adashdim”ni 2006 yilda ijro etganman va uning bu qadar mashhur
bo'lishi o'sha paytlarda xayolimga ham kelmagan.
Fe'l-atvorim og'ir, bosiq. Xayotda ancha kamgapman. Mulohaza bilan ish
yuritishni xush ko'raman. Yolg'iz qolishni yoqtiraman. Yolg'izlik menga ko'proq
o'ylash, mulohaza yuritish va ijod qilish imkonini beradi. Rostgo'ylikni
qadrlayman. Rost so'z men uchun har qanday mukofotdan ham ustun turadi.
Insonlar bilan muloqotda samimiy bo'lishga intilaman. Va o'z navbatida
menga samimiy munosabatda bo'lganlarni ham qadrlayman. Ikki og'iz shirin
so'z menga katta kuch va ilhom bag'ishlaydi.
Bo'sh vaqtlarimda bilyard o'ynashni xush ko'raman. Shuningdek, suzish bilan ham
muntazam ravishda shug'ullanib turaman.
Xayotdagi maqsadim: O'zbekiston xizmat ko'rsatgan hamda Xalq artisti
unvonlariga sazovar bo'lish, yurtimizning eng ulug' bayrami – Mustaqillik
kunida, shuningdek, milliy an'analarimiz aks etgan Navro'z tantanalarida
o'z san'atim bilan ishtirok etish. Shu bilan birga butun dunyoda xonanda
sifatida nom qozonish. Chet ellarda o'zbek san'atini namoyish etish, ovozim
bilan chet elliklarni hayratga solish, yurtimga faqat va faqat olqish olib
kelish.
Orzuim esa... erta menga nima olib kelishini bilmayman. Lekin vaqti
kelib, kutilmagan, hayotimda tub burilish yasaydigan voqea ro'y berishiga
ishonaman... Va kutaman!