Barcha shodlik senga bo'lsin,
Bor sitam, zorlik menga,
Barcha dildorlik sengayu,
Barcha hijronlik menga.
Sen mening jonimni olgin,
Men sening darding olay,
Barcha sog'lik senga bo'lsin,
Barcha bemorlik menga.
Senga bo'lsin barcha husnu
Menga bo'lsin barcha ishq,
Kori xunxorlik sengayu,
Mehri poydorlik menga.
Bu jahonning rohatin ol,
Bor azobin menga ber,
Senga bo'lsin barcha orom,
Barcha bedorlik menga.
Ol o'zing koshonalarni,
Menga qo'y tor kulbani,
Barcha hushyorlik sengayu,
Barcha bedorlik menga.
Senga bo'lsin nurli kunduz,
Menga qolsin qora tun,
Barcha gulshan senga bo'lsin,
Bor tikanzorlik menga.
Sen shahanshohlikni olgin,
Menga qullik bo'lsa bas,
Bor jafokorlik sengayu,
Bor vafodorlik menga.
|
